我在十年前2009年病發，初時只係覺得周身骨痛，做簡單動作起床落地都痛，一路返工一路好眼訓，身邊人以為我扮野想偷懶，點知我開始黃昏發燒，未食完晚飯就想訓，每日都痛到喊...睇左三個月醫生都唔好，轉睇第二個醫生，抽血後轉我睇內科專科醫生，一睇就要入院，一住就三個星期，呢個病攻擊我好多器官：腎炎蛋白尿、肺纖維化、皮膚（好大個蝴蝶）、肝、關節..（仲有兩個但唔記得）。
當時我小朋友只有九個月大，醫生話我係第二個最嚴重既病人，當時已經發左 #高燒 一星期，佢同我老公講再燒就唔得，我老公忍住傷心安慰我陪住我，不停抽血（動脈血好痛）#抽骨髓 好痛、抽肺組織好辛苦、第一次食類固醇係16粒，食完即嘔🤮⋯
但又要再食返晒，食完當晚個頭痛到爆，訓唔到...但終於退燒。住院三個星期既感受仲好歷歷在目，感受好深，到最終可以落床發現對腳好幼，我無左20磅肉，但食類固醇令我臉圓甩頭髮，朋友見到我都想喊，我足足一年無影相，但感恩起碼我出到院可以再見返我仔仔。
呢十年都病發過兩次，由十幾粒藥減到3mg #類固醇，我覺得好好彩了，我每日起身就同自己講要同個病好好相處，佢係我朋友。